أخبار - 2026.10.02

ليلــــى سميـــر: ملحمة راقصة لم تنكسر

بقلم فاخر الرويسي - ولدت ليلى⁽¹⁾ في قرية زواغة البربرية في جنوب مدينة باجة يوم 18 اوت 1937. نشأت في بيت عتيق بين أزقّة ضيّقة لحيّ بائس منسيّ أنهك الفقر وجوه ساكنيه الشاحبة.

لم يكن أحد يتصوّر أنّ حكاية ولدت مع هذه البنت؛ حكاية طفلة فقيرة شقّت طريقها بمفردها وتلمّست مصيرها بصبر وعزيمة لا تلين في وسط محافظ يرى في الحلم ترفاً محرّماً، وفي الفنّ خطيئة...

نشأت الطفلة ليلى لترسم بعصاميتها وبملكة الرّقص التي حباها الله بها لوحات تنطق فنّا وحياة وجمالا وابداعا...

كان عمرها 8 سنوات لما اصطحبها والدها عمّار بن علي ماجري ووالدتها حبيبة إلى حمام الأنف لحضور حفل زواج إحدى قريبتيهما، أحيته المطربة صفية الشامية⁽²⁾.

كانت صفية اللبنانية البيروتية المسقط نجمة صاعدة وقتئذ. وكانت محبوبة لدى الجماهير لحيويّتها ونشاطها وخفّة روحها على الأركاح وفي الحفلات، وكانت تُلقّب بـ "لهلوبة المسرح".

انبهرت ليلى بأدائها وتقدّمت إليها بشجاعة وباحت لها بولعها بالطرب وسألتها عن الطريقة التي تمكّنها من أن تصبح مطربة مثلها: "نحب نولّي نغنّي كيفك...".

وهو سؤال خامر ليلى منذ طفولتها.

ضحكت صفية الشامية وأجابتها بتهكّم:" إمشي لعلي الرّياحي..."

أكّدت لي ليلى في حوارها معي أنّ نبرة صفية وردّها بقيا راسخين في ذاكرتها إلى اليوم.

في منزل صفيّة الشاميّة

في عمر الزّهور ولما بلغت الـ 14 ربيعا قرّرت ليلى الهروب من منزل العائلة للالتحاق بالعاصمة لتحقيق طموحاتها.

وبسرعة، امتطت القطار المؤدّي إلى ساحة برشلونة مجازفة بحياتها، دون أن تقتني تذكرة، غير مبالية بمظهرها وهندامها المتهالك وحالتها الرثّة. وانطلقت بعد وصولها تبحث عن منزل صفية الشاميّة.

روت لي ليلى في أحد لقاءاتنا إنّها لما سألت عن عنوان الدّار أجابوها بأنّ صفية تسكن في نهج البرتقال أريانة.

وواصلت في رواية مغامرتها:

مشيت.. دقّيت الباب وأنا جيعانة وحافية وأيّامي تُكرب... ياخي خَرْجِتلي إمرأة قالتلي: شكونِكْ؟
قلتلها: هاذي دار صفيّة الشاميّة؟
قالتلي: إي نعم
قلتلها: قلها بنية تحب عليك..
قالت صفيّة: دخّلها...
ثم واصلت: تحب تخدم؟
قلتلها: آش نخدم؟!
(ضحْكَِتْ صفيّة!)
قلتلها: ماك قتلي في حمّام الأنف في العرس، إلّي يحب يولّي يغنّي يمشي لعلي الرياحي في صلامبو...موش هكّة؟
صفيّة: آه كبرت!!... ومازلت تعقل عليها!! يعطيك الصحّة...أنا نفذلك عليك وقتها...
قلتلها: مالا كيفاش نعمل نحب نطلع فنّانة؟
صفيّة: آش تحب تعمل؟
قلتلها نحب نغنّي ...
صفيّة: يلزمك غدوة تمشي للرّشيدية وتقابل سي صالح المهدي.
قلتلها: باهي... وتوّة... آنا وين باش نبات؟
صفية: بات عندي

مع صالح المهدي

ومن غُدوة قصدت ربّي... نسأل على الرّشيدية... دخلت المدرسة نلقى الزّهرة فائزة⁽³⁾ خارجة...قلتلها: يا مدام يا مدام، بْرَبّي صالح المهدي...
الزهرة فائزة: هكّة!!... صالح المهدي!! ياخي ما تقولش حتى عم صالح!!؟ ...وعلاش حاشتك بيه؟
قلتلها: نحب نغنّي...
ضحكت الزّهرة فائزة وشدّتني من يدّي ودخّلتني... حالتي حليلة... لابسة شلاكة وعريانة... وجيعانة... وامّسخة... نادت بنفسها لسي صالح، وكان قاعد في صالة على اليمين.
قعدت نحكي معاه...جاب العود...
صالح المهدي: آش باش تغنّي يا بنتي؟
قتلو: غناية ليلى مراد "لما قابلني سلم عليّ"... إلّي شطحت عليها نعيمة عاكف في فيلم "عزيزة" وهي من تلحين محمد عبد الوهاب...
صالح المهدي: يا بنتي صوتك موش لاك الكلّ... تحبّش تولّي تشطح؟ هاو عندي مجموعة قاعدة تتعلّم هنا... إيجا تعلّم الرّقص...
قتلو: إيْ نعرف نشطح مليح... ياخي دخّلني لبيت المجموعة...
صالح المهدي: هيّا ورّينا ضربة ولا اثنين...
تواصل ليلى: شاخ عم صالح... كنت مغرومة برشة بسامية جمال وتحية كريكوكا وانقلّد فيهم في الدّار كي نبدى وحدي...
صالح المهدي: باش تعطلع رقّاصة عظيمة...
قتلو: عم صالح راو ما عنديش وين نبات!
قالت لي الزهرة فائزة: ياخي ماعندكش فين؟!!
قلتلها: لا
تقول ليلى: بدأت الزّهرة فائزة تسأل فيّ، منين إنتِ وتسأل عليّ... وعلى فاميلتي... إلى الآن ما نعرفش كيفاش عرفوا إلّي الشرطة تلوّج عليّا... الحاصل أيّام تُكْرُبْ...

في الرّشيدية

خافوا ...هذا في الخمسينات... وفي الأخير هزّتني الزّهرة فائزة وسكنت عندها تقريب خمسة ولا ستة أشهر... نقوم بأشغال منزلية، نمسح ونسيّق ونطيّب ونعاون فيها... ونمشي للرّشيدية نتعلّم الرّقص مع زهرة لمبوبة⁽⁴⁾، وكريمة البنزرتية، وعفيفة خيري الرّاقصة الباجية...

صورة لليلى من أرشيف المصوّر الشهير النّاصر بوديدح

مزيّة الزّهرة فائزة ما نناساهاش... والحقيقة كلهم عملوا معايا المليح...

سي صالح المهدي عندو زادة فضل عليّ، توسّطلي باش نقرى في الرّشيدية، وسخّر لي آنا وصاحباتي مُعلّم إسمو بلحسن بن الشاذلي، قرّانا وعلّمنا نكتبوا... كان يقول لي سي صالح: راك مازلت صغيرة...تعلّم أقرى...

عفيفة خيري زميلتي في الرّشيدية كي لقاتني كيفها باجيّة، هزّتني نسكن عندها في باب سويقة... كانت تسكن هي وأمها...

ومن وقتها ولّات تهزّني معاها للعروسات وعملتلي كسوة... ونشطح في الحفلات... وبديت نِتْعْرَفْ شويّة...

جاء مرّة مطرب الشّباب محمد أحمد⁽⁵⁾ في حفلة... كيف راني نرقص عْجِبْتُو... سمّاني "فكريّة"... تدخّل شقيقه سي البشير أحمد الله يرحمو قالو لا... هاذي سَمْرة... نسمّيوها "ليلــى سمير"...
ومن وقتها ولّى اسمي الفنّي.

مع فتحية خيري

تواصل ليلى: فتحية خيري هي التي اكتشفتني وشجّعتني أكثر من النّاس الكل... جات في فرح تتفرّج... ناداتلي وكان معاها رضا القلعي⁽⁶⁾ ...

قالت لي: يا بنية إنت وقتاش بديت؟ وأسئلة أخرى... حكيتلها على كل شيء... قالتلي تخدم معايا في صالة الفتح في رمضان؟...

مع فتحية خيري

فرحت ومباشرة وافقتها... عطاتني موعد وتقابلت معاها، وحضر رضا القلعي وأحمد الغربي صاحب الصّالة...

قالتلهم: أعملولها بروفة...

بعد ما شافوا رقصي قاللها رضا القلعي: هاذي منها نُخلقوا ... وباش تخدم معانا!

تقول ليلى: كنت صغيرة أما طلعت طلعة وحدة... واشتهرت بسرعة...

كنت جميلة، وكانوا يُشبهوني بصُوفيا لوران⁽⁷⁾ Sofia Loren وكلوديا كردينال⁽⁸⁾ Claudia Cardinale

راقصات سبقتها...وأخرى من جيلها

تقول ليلى:

هناك جيل سبقني في الرّقص أحترمه كثيرا. كانت روحية الأمريكية راقصة ممتازة... كنت فرخة... نجي بنتها... بعدها خَرْجِتْ راقصة أخرى اسمها روحية الصّغيرة... تونسية... وكانوا يتهكّموا عليها المسكينة بمناداتها "روحية كرذونة"! علاش؟ ... لأنّ روحية الأخرى زوجة قدّور الصرارفي شابّة ياسر وزلزلة ... لكن ماجابش منها صغار... روحية الصّغيرة كانت ناس ملاح سكّنتني زادة في دارها مدّة.

من جيلي كانت نزهة أمير هي النّجمة الأولى في الرّقص وكانت تشطح في حفلات سيدي علي الرياحي، ونعيمة الجزائرية، وعائشة وماميّة، وكذلك هندة الجزائرية زوجة الهادي القلّال⁽⁹⁾. وزينة وعزيزة، وزهرة لمبوبة في طنبكها... كانت زهرة تخدم مع محمد اللّغبابي. وطبعا كنت مع المجموعة... خلطت عليّ بديعة خيري.

بعد نزهة أمير تجي روحية، من بعدها روحية الصّغيرة. ومن بعد طلعت آنا "كي الفلاش" نعمل 4 أو 5 عروسات في اللّيلة... ما بين صالة مدريد صالة الفتح ... صالة قرطبة ... نزل سان ورج... وكازينو حلق الوادي خدمت فيه آنا وسيدي علي الرّياحي الله يرحمو... وكازينو حمّام الأنف...

في حفل بقصر الجمعيات ويظهر في الصورة حسن الغربي ورضا القلعي وغيرهما من العازفين

في صالة الفتح في رمضان كنت نرقص مع عديد المطربين، منهم خاصّة فتحية خيري، علية، صفيّة، نعمة، الهادي المقراني، الهادي القلال... الفكاهي الهادي السّملالي، وكان البشير جوهر يعزف على الترومبيت.

درناها شليلة ومْليلة: جربة، صفاقس، مدنين، ڤابس، جرجيس، بنزرت، باجة -مسقط رأسي ومسقط رأس زهيرة سالم- جندوبة وعين دراهم... كل الجمهورية نعرفها... وكل مدينة نزوروها نباتوا فيها...نعملوا 5 و6 حفلات ويبيّتونا في الفروحات ...والوالي والمعتمد يفرحوا بينا ويدلّلونا... هي ماكلة... هو شيء!

ليلى سمير مع نعمة

كنّا نمشيو مع فرقة الإذاعة خاصّة في عيد ميلاد الرّئيس. كنا نعملوا عيد ميلادو في المنستير، وجاء عبد الحليم حافظ... جابو رئيس النّادي الإفريقي فتحي زهير المحامي إلّي كان زوج فتحية خيري. وعمل حفلة في القبّة وقتها...

شاركت في حفل نظّمو الترجي الرياضي التونسي. نتفكّر إلّي قبضت ليلتها 6 دينارات... واللي يضحّك إلّي سوم الرّوبّة إلّي شطحت بيها 150 وقتها... كان عالم آخر... كنّا نشمّوا كفوفنا نشبعوا... الفلوس ما كانتش عندهاش قيمة كبيرة عندنا...

رقصت في الحفلات التي احياها عبد المطلب في نزل سان جورج، شاركت فيها المطربة شهرزاد وشفيق جلال وعواطف فاضل وحورية حسن. وخدمنا زادة في البالماريوم.

سافرت للخارج عدّة مرات وبرزت في زيارة بورقيبة للبلدان الإسكندنافية... وشطحت في ليبيا الجزائر المغرب وكنت سفيرة تونس في عدة بلدان...

كانوا يتنافسوا باش نخدملهم ... كنت نقبل عرس في صالة مدريد، وفي سان جورج، وفي باب الخضراء، وفي صالة الفتح. لكن ما كانش عندي سقف يأويني... في اللّيل كل مرّة وين يطيح اللّيل نبات كيما يقولوا...

كي مانلقاش وين، نبات في وتيل العيّاشي... نكري بيت ونرقد... حتى تعرفت على بابا حمّادي ختروش...درابكي... عندو دار في زنقة الكبدة في باب سويقة متزوّج وعندو أبناء... يلِمّنا البنات الشطّاحات ويجيبنا عندو بحذا عائلتو... يبدا يدربكلنا واحنا نشطحوا في وسط الدّار... دار عربي... كانت الدربوكة في دمّو...

قعدت عندو... كان يبيتنا بحذا مرتو وأولادو... كان مغروم بالدّربيك ورقص النّساء... كانت مرتو الله يرحمها ناس طيبة... ونحبّوها ... نعيطولها نانا.. نانا... نانا... تربّينا غادي...

ليلى سمير مع المطرب شفيق جلال سبتمبر 1958

مع سوكارنو

سنوات الاستقلال الأولى استضاف الرّئيس عدد من رؤساء العالم وخاصّة الأفارقة. من هؤلاء أدّى الرّئيس أحمد سوكارنو⁽¹⁰⁾ رئيس أندونيسيا زيارة لتونس واحتفى به الرئيس بورقيبة. وأسدى تعليماته لإدارة التشريفات لإقامة حفلات على شرفه. ودعيت مجموعة من الرّاقصات والمطربين والمطربات لتأثيث حفل ساهر.

روت لي ليلى أنّ الرئيس سيكوتوري كان يحب الحفلات...

تقول ليلى: لا توجد راقصة تونسية تضاهيني في "فتحة الساقين الكبيرة" Le grand écart...

كمّلت الرّقص، أُعجب بي سوكارنو كثيرا... لبّسني عقد (شَرْكة) فل بنفسه... وتحدّث إليّ طويلا... الجميع علّق كثيرا على اهتمامه وتبجيله لي...
وتلك قصّة أخرى...

زواجها

في حفلة من الحفلات تعرّف عليّ سي المنصف البادري... كان كوميسار في الأمن... اعترضني في باب سويقة الرّابعة صباحا وقال لي: إنتِ باش تولّي مَرْتي... لم أعِرْ اهتماما للأمر. لما علم بظروفي كرالي دار في لافايات، وولّيت نعيش معاه... وحبّينا بعضنا... تزوّجني... وجاب مني طفلة سمّيناها سُرور...

زوجي سي المنصف خرج من سلك الأمن قبل ما يحلّ مقهى بالباساج. ثم مطعم في حلق الوادي "ليكيلوس"...أوّل شارع روزفلت... وولّى صاحب مشاريع... وكان يشجّعني على مواصلة الرّقص...

العمل مع الفرق

اشتغلت مع العديد من الفرق:
فرقة المنار بقيادة رضا القلعي - فرقة نجوم المنار - فرقة فتحية خيري بقيادة قدّور الصرارفي⁽¹¹⁾ ومع فرقة الخضراء بقيادته أيضا - فرقة الأندلس بقيادة عبد الحميد بلعلجية - فرقة العصر بقيادة حسن الغربي - فرقة علي الرّياحي... وفرق أخرى
وكانوا يسمِّيونا "صانْعات".

بالي اللّغبابي

خدمت في بالي حمّادي اللّغبابي فترة قصيرة في الخارج... حبّني نخدم معاه... وكان هذا في شهر رمضان 1958. في مسابقة نظمتها بلدية تونس وقتها خذيت جائزة زرياب في الرّقص الشعبي رغم إلّي اختصاصي شرقي. ما كانش حمّادي اللّغبابي وراء نجاحي وانطلاقتي، وما خدمتش معاه بصفة مستمرّة كيما كتب الطّاهر الملّيجي... هاذي زادها من عندو...⁽¹²⁾ من خيالو!

مع الرئيس بورقيبــــة

جاني صالح المهدي وقال لي: الرئيس بورقيبة باش يأدّي زيارة للسويد وما شية معاه بالي اللغبابي باش نعرّفوا بالفلكلور التونسي، وماشين معاه زينة وعزيزة.
نحبك تمشي مع البالي...ورانا باش نشاركوا في مسابقة. ونحبّو البالي التونسي ياخو الجائزة...

قتلو: لا آنا ما نشطحش بالملية.. وما نحبّش الطبّال ملّي آنا صغيرة...

قال سي صالح: عيّش بنتي... عيّش بنتي... سمعة تونس في الميزان...

قتلو: باهي، على شرط نخيّط حاجة تشبه الملية نشطح بيها...

وافق... مشيت قصّيت 3 ميترو قماش كراب جورجيت Crêpe Georgette بيضاء من عند ولد بن ملوكة في سيدي محرز، وعملت بيها لبسة تشبه الملية... وخذيت طرف قماش أبيض... وشاركنا في المسابقة في الكازينو إلّي كان في باب بحر... ووفقنا ربّي وخذينا الجائزة...

وفاة علي الرياحي

في المسرح البلدي كنت مشاركة في الحفلة إلّي توفّى فيها سيدي علي الله يرحمو...تشوينا
في الحفلة كان يخرج مطرب تتبعو راقصة.. خرج أحمد حمزة يغنّي...
أعلنوا عليّ عندما كنت جالسة مع سيدي علي وسلاف في نفس اللّوج...
سيد أحمد قاعد وسيدي علي يفدلك مع سلاف يقوللها: "رح نتـڤـوزك النّهـار ده"...
كنّا نضحكوا وشايخين... كان سيد أحمد يقول لي: تي أهبط... تي أهبط... راهُم عِلْنُوا عليك...

علي الرياحي وليلى سمير

خيّطت كسوة خاصة بتلك السّهرة... والكسوة هاذي عندها قصّة: جات نجوى فؤاد⁽¹³⁾ إلى تونس... وسكنت في الهلتون... وضيفتها في "ليكيلوس" متاعنا... في حلق الوادي... قلت لها تبيعي لي كسوتك؟ ..

قالت لي: لا أنا رايحة للمغرب...لا يمكن لي ذلك...لكن يمكن إعارتها لك تخيّطي مثلها...
هزّيتها إلى بابا حمّادي التّارزي المشهور في باب سويقة، خذا الموديل...

في الحفلة نتلفّت لسيدي علي ونقلو: سيدي علي، باهية الكسوة؟
علي الرّياحي (بالمصري): أوه...إيه الڤمال ده... حِلوة البُدلة دي ...حِلوة...
هذا دقائق قبل وفاته... وزاد قال لي:
هيا أهبط... أهبط...وكان يبعث لي بالتحية والقبلات بيدّو وآنا هابطة...
نأكّدلك إلّي عمرو ما عملهالي قبل!!....
هبطت على المسرح وعملت النّومرو متاعي... ليلتها عرس بنت سعيدة ساسي⁽¹⁴⁾ في نزل الماجستيك... وليلتها إلّي يعمل نومرو في التياترو (المسرح البلدي) يمشي للماجستيك.

خرجت بسيّارتي ومشيت للماجستيك...وخلّيت سيدي علي باش يغنّي.
خلط أحمد حمزة للنزل... وبدأ يعيّط ويضرب في راسو بيديه...

قتلو آش بيك سِيدْ أحمد؟

قال لي: سيدي علي توفّى... صار الدّوام لله... أستغفر الله... طاح على خشبة المسرح... كان يغني فجأة طاح على الرّكح... وفاض عليه الدمّ... هزّوه للسّبيطار....
...قمت نبكي انا وقلت نخلطوا عليه...
قامت قالت سعيدة ساسي: وعرس ولدي؟!!!
...قلتلها: أحنا نضويوا عليكم كي الشمعة، وسيدي علي مات وتحبّني آنا نشطح؟!!! ...
والله كي تهزوني للحبس!
ما خفتش منها... أنا كنت قبيحة... من بعد طلعت نشطح... لكن موش شطيح العادة... شطحة لا فيها طعم ولا لون... عندكش عندي...
مشينا للسّبيطار لقيناه غادر الحياة... توفّى وحطّوه في غرفة الموتى".

الاعتزال

آخر عرض رقصت فيه ليلى سمير كان ببوعرادة مع فرقة العصر. شاركت فيها علية وصفية الشامية والهادي القلال.

تقول ليلى: كْرِمْت لِحْيتي بيدي... اعتزلت... كنت مع سي المنصف راجلي نعملوا حفلات كبيرة في دارنا الجديدة إلّي شريناها قفا سفارة المغرب في ساحة باستور... الفنّانين الكلّ كانوا يجيونا للدّار... الكلّهم...كانت أجواء حميمية وصافية.

في الثمانينات بعد حجة سي المنصف بطّلت الرّقص وما عادش نعمل حفلات في الدّار... وانسحب الأصدقاء بالواحد... ما عادش يجي حدّ... وما عادش يطل حدّ...

اليوم بلغت ليلى سمير تسعة وثمانون عاما... أنهكها الكبر والمرض بعد مسيرة حافلة من العطاء...

خاتمـــة

انّها مسيرة طفلة عشقت الرّقص. ثبتت وواجهت محيطها وعقليات محافظة. اثبتت من خلال مسيرتها وتضحياتها والعراقيل التي اعترضتها أنّ الإبداع ينهض كالعنقاء في قلب الرّماد، لا في القصور والسّرايا والبيوت الفخمة. طيلة مشوارها الفني لم تثنيها صعوبات الحياة وقساوتها من التمرد والثورة واسعاد الناس.

أطال الله في عمرها

فاخر الرويسي

(1) اسمها الحقيقي منجية ماجري.

(2) اسمها الحقيقي شريفة 'أحمد قنون'، ولدت في 9 جانفي 1932 في بيروت وتوفّيت في 17 ديسمبر 2004 بتونس.

(3) الزهرة فائزة : ممثلة تونسية ولدت في 10 نوفمبر 1919 - توفيت بتونس في 28 جانفي 1999.

(4) هي زهرة الخميري، شهرت لمبوبة، راقصة تونسية ولدت سنة 1929 بجندوبة.

(5) توفي يوم الجمعة 8 جانفي 2016

(6) رضا القلعي: موسيقار تونسي ومن أشهر العازفين على آلة الكمنجة، ولد في ماي 1931 بتونس وتوفي يوم 7 ماي 2004.

(7) صوفيا لورين: هي Sofia Villani Scicolone ممثلة سنيمائية ومطربة وعارضة أزياء ولدت بروما سنة 1934.

(8) كلوديا كاردينال: ممثلة سنيمائية وعارضة أزياء إيطالية ولدت بحلق الوادي تونس سنة 1938 وتوفيت بفرنسا سنة 2025.

(9) الهدي القلال: مطرب تونسي ولد يوم 7 فيفري سنة 1932 - توفي في 15 مارس 2015.

(10) احمد سوكارنو: اول رئيس أندونيسيا، ولد سنة 1901 توفي سنة 1970.